जनकपुरधाम ।
कातिक पूर्णिमाका दिन कमला स्नान गर्न नेपाल भारतको विभिन्न स्थानबाट आएका साधुसंतहरुलाई नेपाल भारत खुला सीमा संवाद समूहले स्वागत एवं सम्मान कार्यक्रम गरेको छ । धनुषाको सतोषरघाटमा भएको सो कार्यक्रममा सयौ साधुहरुको सहभागिता रहेको थियो ।
साधुलाई सम्मान गर्ने युगोदेखि चल्दै आएको परम्पराको आफूहरु निरन्तरता दिएको नेपाल भारत खुला सिमा संवाद समूहका केन्द्रिय अध्यक्ष राजीव झाले बताए । उहाँले कमला नदी नेपाल भारतको मित्रताको प्रतीक रहेकाले यो नदीमा स्नान गर्न आउनेहरुलाई आफूहरु विशेष सम्मानका साथ हेर्ने गरेको उल्लेख गरे ।
समारोहमा समूहका केन्द्रिय सचिव अनिल सिंह, मधेश प्रदेश सहसंयोजक दीपक यादव, धनुषा जिल्ला अध्यक्ष मनोज साह, कार्यालय सचिव कृष्ण कुमार साह, रास्ट्रीय मुक्ति पार्टी संजय सिंह सहित समूहका धनुषा र महोत्तरीका पदाधिकारीहरुको सहभागिता रहेको थियो ।
करीब २५०को संख्यामा रहेको साधु संतहरुलाइ च्युरा, दही चिनी, तरकारी अचारको भण्डारा गरिएको छ ।
कार्तिक पूर्णिमा हिन्दू धर्मको पवित्र पर्व हो, जसमा विशेषगरी धार्मिक अनुष्ठान, स्नान, र पूजापाठ गर्ने गरिन्छ । यो दिन गंगा, सरयू, यमुना, र नेपालका नदीहरूमा स्नान गर्ने परम्परा रहेको छ । जनकपुरधाम क्षेत्रका श्रद्धालुहरूको लागि विशेषगरी कमला नदीमा स्नान गरेर पुण्य प्राप्त गर्ने मान्यता रहेको छ ।
कमला नदी नेपालको सिन्धुली जिल्लामा माइथान नजिकको चुरे क्षेत्रबाट सुरु हुने नदी हो । यो नदी सिन्धुली हुदै उदयपुर, सिरहा र धनुषाको सिमाना हुँदै सिधै भारतको गंगा नदीमा गएर मिसिन्छ ।
