जनकपुरधाम ।
हजारो व्यक्तिले स्वर्गीय भएका आफना पूर्वजको पितृपक्षको आज अन्तिम दिन जनकपुरधामको गंगासागरमा तर्पण दिएका छन् । असोज १ गतेदेखि प्रारम्भ भएको पितृपक्षको विधिवत् आज समापन भएको छ । आजको तिथिलाई औँसी श्राद्ध पनि भनिन्छ ।
पितृपक्षका १५ तिथि र आश्विन शुक्ल प्रतिपदाको एक दिन गरी सोह्र तिथिका दिनसम्म दिवङ्गत पितृका नाममा तर्पण, सिदादान र पिण्डदान गरिने पितृपक्षलाई सोह्रश्राद्ध पनि भनिन्छ । कुनै कारणवश यो पक्षका अरु तिथिमा गर्नुपर्ने श्राद्ध रोकिएको भए आज गर्नुपर्छ भन्ने शास्त्रीय मत छ । कुनै कारणवश रोकिए आज पनि गर्न नसकेमा आपत् धर्मअनुसार आश्विन शुक्ल प्रतिपदादेखि आश्विन शुक्ल पञ्चमीसम्म गर्न हुने शास्त्रीय मान्यता छ ।
गंगासागरमा भदौ १ गतेदेखि नै तर्पण दिनेको भीड रहेको थियो । प्रत्येक दिन बिहान स्वर्गीय भएका आफना पूर्वजको स्थानीयवासीहरुले तर्पण दिदै आएका थिए ।
