जनकपुरधाम ।
कोशीमा पानीको बहाब अत्यधिक बढेपछि कोशी ब्यारेज नियन्त्रण कक्षले ’रेड अलर्ट’ जारी गरेको छ । शनिबार दिउँसो १ बजेको मापनअनुसार कोशी ब्यारेज भएर प्रतिसेकेन्ड ५ लाख २१ हजार क्युसेक पानीको बहाब भइरहेको छ ।
ब्यारेजका ५६ वटै ढोका शनिबार बिहान ८ बजेदेखि नै खोलिएको छ । सन् १९६२ मा कोशी ब्यारेजको संरचना सञ्चालनमा आएपछि ९ लाख ५० हजार क्युसेक पानीको बहाब हुने क्षमता भनिएको थियो ।
तर पछिल्ला दिनहरुमा कोशी ब्यारेजका पुल नजिक बालुवा थुप्रिएका कारण ब्यारेजबाट हुने बहाब क्षमतामा कमी आएको हो ।
वर्षा निरन्तर भइरहेकोले अझै बहाब बढन सक्ने कोशी ब्यारेज नियन्त्रण कक्षले जनाएको छ। कोशी ब्यारेज पुलमा सर्वसाधारणको सुरक्षाका लागि अस्थायी रूपमा आवतजावतमा रोक लगाइएको छ ।
सवारीसाधनलाई अनुमति दिइएको छ । सप्तरीका प्रमुख जिल्ला अधिकारी मेखबहादुर मंग्राती नेतृत्वको स्थानीय प्रशासनको टोली कोशी ब्यारेज र कोशीको संरचनाको निरीक्षण गरेका छन् ।
