काठमाडौं ।
राष्ट्रिय स्वतन्त्र पार्टीले केन्द्रीय समितिको बैठक बोलाएको छ । आइतबार बिहानको ११ः३० बजे पार्टी केन्द्रीय कार्यालय वनस्थलीमा बस्ने गरी बैठक बोलाइएको कार्यवाहक प्रवक्ता मनिष झाले बताए ।
बैठकमा छलफलका लागि ६ एजेण्डा तय भएको छ । बैठकमा समसामयिक राजनीतिक गतिविधि, चीन भ्रमण र पार्टी गतिविधि रिपोर्टिङ, प्रथम राष्ट्रिय भेलाको समीक्षा, स्थानीय तह उपनिर्वाचनबारे, महाधिवेशन केन्द्रित गतिविधि र विविध विषयमा छलफल हुने उनले बताए ।
पार्टी सभापति रवि लामिछाने सहकारी प्रकरणको विषयलाई लिएर पक्राउ तयारी भएको चर्चापछि रास्वपामा तरंग पैदा भएको छ । सभापति लामिछाने पक्राउ पर्ने चर्चापछि चीन भ्रमणमा गएका नेताहरू पनि छोट्याएर फर्किएका छन् ।
सहकारी ठगी प्रकरणमा आफ्नो संलग्नता नभएको संसदीय समितिले ठहर गरेपछि राजनीतिक प्रतिशोध राखेर आफूलाई पक्राउ गर्न खोजिएको लामिछानेको आरोप छ ।
