जनकपुरधाम ।
सामाजिक सुरक्षा सुदृढ गर्दै नागरिकको जीवनस्तर उकास्न मधेश सरकारले बीमा कार्यक्रम सुरु गरेको छ । साउन १ गतेदेखि औपचारिक रूपमा लागू भएको यो योजनाको पहिलो चरणमा एक लाख घरधुरी र ६ हजार ६ सय नागरिक बीमाको दायरामा ल्याइएको छ ।
प्रदेश सरकारले करिब ५९ अर्ब १० करोड रुपैयाँ बराबरको बीमा सुरक्षा सुनिश्चित गर्दै सामाजिक सुरक्षाको क्षेत्रमा महत्वपूर्ण उपलब्धि हासिल गरेको जनाएको छ । कार्यक्रमले विशेष गरी विपन्न, सिमान्तकृत तथा जोखिममा रहेका वर्गलाई केन्द्रमा राखेको छ ।
घरधुरी बीमा अन्तर्गत आगलागी, चट्याङ, बाढी, पहिरो, आँधी–हुरीलगायत प्राकृतिक विपद्का घटनामा पाँच लाख रुपैयाँसम्मको क्षतिपूर्ति प्रदान गरिनेछ । उता, नागरिक बीमा अन्तर्गत आकस्मिक मृत्यु, दुर्घटनाबाट हुने शारीरिक अपांगता तथा घाइते अवस्थालाई समेट्दै अधिकतम १० लाख रुपैयाँसम्मको बीमा सुविधा उपलब्ध गराइनेछ ।
बीमा दाबी गर्न प्रमाणसहितको निवेदन, प्रहरी प्रतिवेदन, अस्पतालको रिपोर्ट, स्थानीय पालिकाको सिफारिस र नागरिकताको प्रमाण आवश्यक पर्नेछ ।
