जनकपुरधाम ।
सिरहा कारागारमा आइतबार दिउँसो कैदीबन्दीहरूबीच भएको झडपमा १३ जना घाइते भएका छन् ।
सिरहाका सहायक प्रमुख जिल्ला अधिकारी चेतराज बरालका अनुसार दिउँसो करिब ३ः३० बजे कारागारभित्र आन्तरिक प्रशासनको नाइके तोक्ने विषयमा विवाद हुँदा झडप भएको हो । “कसले आन्तरिक नेतृत्व गर्ने भन्ने विषयमा विवाद चर्किएपछि कैदीहरू आपसमा झगडामा उत्रिएका हुन्,“ उनले बताए । झडपमा घाइते भएका १३ जना कैदीहरूको सिरहास्थित प्रादेशिक अस्पतालमा उपचार भइरहेको छ । उनीहरू सबैको अवस्था सामान्य रहेको प्रारम्भिक जानकारीमा उल्लेख छ ।
घटनापछि कारागारमा थप सुरक्षाकर्मी खटाइएको छ भने झडपमा संलग्न रहेका व्यक्तिहरूको पहिचान गरी अनुशासनात्मक कारबाही प्रक्रिया अघि बढाउने तयारी भइरहेको प्रशासनले जनाएको छ ।
