काठमाडौं ।
नेपाली कांग्रेस केन्द्रीय कार्य समितिको बैठक सोमबार पनि बस्दैछ । बैठक दिउँसो २ बजे पार्टी केन्द्रीय कार्यालय सानेपामा सुरु हुनेछ ।
यही असार १६ गते सुरु भएको केन्द्रीय कार्यसमिति बैठकमा आइतबारसम्म केन्द्रीय सदस्य, आमन्त्रित केन्द्रीय सदस्यहरू, कोषाध्यक्ष तथा सहमहामन्त्रीहरूले आफ्नो धारणा राखिसकेका छन् । बाँकी पदाधिकारीले आजको बैठकमा बोलिसकेपछि बैठकमा पेस भएका प्रस्ताव निर्णयार्थ प्रस्तुत गरिने बताइएको छ ।
सोमबारको बैठकमा महामन्त्रीद्वय गगनकुमार थापा र विश्वप्रकाश शर्मा, उपसभापतिद्वय पूर्णबहादुर खड्का र धनराज गुरुङले धारणा राख्ने छन् । बैठकको अन्त्यमा सभापति शेरबहादुर देउवाले सम्बोधन गरेसँगै आवश्यक निर्णयसहित बैठक सम्पन्न हुने पार्टी कार्यालयले जनाएको छ ।
कांग्रेस विधानअनुसार १६७ सदस्यीय केन्द्रीय कार्यसमिति रहने व्यवस्था छ । तर सभापतिका निकटतम् प्रतिस्पर्धी एक जना पनि केन्द्रीय कार्यसमिति रहने प्रावधान अनुसार केन्द्रीय समिति १६८ सदस्यीय छ ।
बैठकमा आमन्त्रित केन्द्रीय सदस्य तीन, आमन्त्रित सात प्रदेशका पार्टी सभापति, केन्द्रीय सदस्य नभएका आमन्त्रित गरिएका चार मन्त्रीहरू रामनाथ अधिकारी, ऐनबहादुर शाही ठकुरी, तेजुलाल चौधरी र राज्यमन्त्री खमबहादुर गर्बुजाले पनि धारणा राखेका थिए ।
