जनकपुरधाम ।
गृहमन्त्री रमेश लेखकले जिल्ला प्रशासन कार्यालय धनुषाको निर्माण हुन लागेको भवन शिलान्यास गरेका छन् । सेवाग्राहीलाई सेवा प्रवाहमा पुरानो भवनबाट समस्या हुँदै आईरहेकाले नयाँ प्रशासनिक भवनको निर्माण गर्न लागिएको हो । जिल्ला प्रशासन कार्यालय धनुषाको निर्माण हुन लागेको सोही भवनको शुक्रबार गृहमन्त्री लेखकले एक कार्यक्रमका बिच शिलान्यास गरेका हुन् ।
अहिलेको प्रशासनिक भवन पुरानो तथा जिर्ण हुन थालेपछि नयाँ प्रशासनिक भवन निर्माणका लागि गृह मन्त्रालयले ७ करोड ८७ लाख ९४ हजार ५ सय ६६ रुपैयाँमा बजेट विनियोजन गरेको थियो । सो भवन निर्माणका लागि सावित्री निर्माण सेवाले ५ करोड ४७ लाख २९ हजार ४४७मा ठेक्का सम्झौता गरेको छ ।
१६ हजार १६३ वर्गफिटको उक्त तीनतल्ले भवन २०८३ असार २८ गतेभित्र निर्माण गरिसक्नुपर्ने सम्झौता भएको छ । संघीय आयोजना कार्यान्वयन इकाई कार्यालयको रेखदेखमा बन्ने भवनको मोडेल आरसीसी फ्रेमको हुने जनाइएको छ ।
