एजेन्सी ।
इजरायली प्रधानमन्त्रीको कार्यालयले अमेरिकी राष्ट्रपति डोनाल्ड ट्रम्पले प्रस्ताव गरेको इराक–इजरायल युद्धविराम सम्झौता स्वीकार गरेको छ ।
प्रधानमन्त्री कार्यालयले एक विज्ञप्ति जारी गर्दै इजरायली प्रधानमन्त्री बेन्जामिन नेतन्याहुले उक्त प्रस्ताव स्वीकार गरेको जानकारी दिएको छ ।
प्रधानमन्त्री कार्यालयका अनुसार नेतान्याहुले आजै एक आधिकारिक वक्तव्य जारी गर्ने तयारी गरेका छन् ।
अमेरिकी राष्ट्रपति डोनाल्ड ट्रम्पले ट्रुथ सोसल मा एक पोस्ट गर्दै युद्धविराम सुरु भइसकेको जनाएलगत्तै नेतान्याहुको यो भनाइ आएको हो । ‘युद्धविराम अब सुरु भइसकेको छ। कृपया यसको उल्लंघन नगर्नुहोस्!,’ ट्रम्पले भनेका थिए ।
यसअघि उनले ट्रुथ सोसल मा नै इजरायल र इरानबीच युद्धविराम भएको घोषणा गरेका थिए ।
गए राति इजरायलले तेहरानमाथि क्षेप्यास्त्र हमला गरेको थियो। त्यसको जवाफस्वरूप मंगलबार बिहान इरानले इजरायलतर्फ मिसाइल प्रहार गरेको थियो। इरानी आक्रमणमा चार जनाको मृत्यु भएको पुष्टि गरिएको छ ।
इरानको सरकारी सञ्चारमाध्यमका अनुसार युद्धविराम लागु हुनु अघि ‘मिसाइल आक्रमणको अन्तिम चरण’ सम्पन्न भएको थियो ।
त्यस्तै, इरानको तास्नीम समाचार एजेन्सीका अनुसार देशको उत्तरपश्चिमी गिलान प्रान्तमा इजरायली हवाई आक्रमणले चारवटा आवासीय युनिटहरूलाई लक्षित गर्दा नौ जना सर्वसाधारणको ज्यान गएको छ ।
क्षेत्रीय गभर्नरलाई उद्धृत गर्दै समाचारमा जनाइएअनुसार, उक्त आक्रमणले वरपरका धेरै घरहरूमा क्षति पु¥याएको छ र ३३ जना घाइते भएका छन्, जसमध्ये पाँच जनालाई अस्पतालमा भर्ना गर्नुपरेको छ ।
रिपोर्ट अनुसार घाइते तथा मृतकमध्ये १६ जना महिला र बालबालिका छन् ।
