बुटवल ।
प्रहरी चौकी, हाटी बनगाई दुर्गौलियामा कार्यरत प्रहरी नायब निरीक्षक खिम बहादुर खड्का घुस रकमसहित पक्राउ परेका छन्।
अख्तियार दुरुपयोग अनुसन्धान आयोगको टोलीले बिहीबार उनलाई ३० हजार रुपैयाँ घुस रकमसहित नियन्त्रणमा लिएको हो।
सइ खड्काले भारतबाट रुपन्देही जिल्लाको दुर्गौलिया नाका हुँदै भन्सार छली अवैधरुपमा घरायसी प्रयोजनका सामान ल्याउन सहजीकरण गरीदिने भनी सेवाग्राहीसँग घुस माग गरेको अख्तियारको दाबी छ।
आयोगको कार्यालय, बुटवलबाट खटिई गएको टोलीले खड्कालाई सेवाग्राहीबाट ३० हजार रुपैयाँ घुस/रिसवत लिइसकेको अवस्थामा उक्त रकमसहित रुपन्देहीको मायादेवी गाउँपालिका वडा नं–६ अन्तर्गतबाट आज नियन्त्रणमा लिएको हो।
उनीमाथि थप अनुसन्धान भइरहेको अख्तियारले जनाएको छ।
