जनकपुरधाम ।
धनुषा प्रहरीले ८० लाख रुपैयाँ लुटपाट गर्ने समूहका एकजनालाई पक्राउ गरेको छ । घटना भएको १० महिनापछि विशेष सूचनाको आधारमा मिथिला नगरपालिका ३का भरत कुमार महतोलाई पक्राउ गरिएको जिल्ला प्रहरी कार्यालय धनुषाका प्रहरी नायव उपरीक्षक वरुणबहादुर सिंहले जानकारी दिए ।
प्रहरी नायव उपरीक्षक सिंहका अनुसार गत वैशाख २४मा जनकपुरधाम उपमहानगरपालिका १९ थुमौना सडक खण्डमा लुटपाट भएको थियो ।
उनले भने, ‘नम्बर नखुलेको मोटरसाइकलमा तीन जना आएर उक्त सडकखण्डबाट वीरेन्द्र महतोले बोकेर हिँडेको पैसा लुटपाट गरेका थिए, हतियार देखाइ महतोसँग भएको ८० लाख रुपैयाँ त्यो लुटिएको थियो । त्यही घटनामा संलग्न फरार प्रतिवादी आज पक्राउ परेका हुन् ।’
पक्राउ परेका महतोलाई जिल्ला अदालतबाट म्याद थप भई आवश्यक अनुसन्धान सुरु गरिएको प्रहरीले जनाएको छ ।
