जनकपुरधाम ।
जनकपुरधाम उपमहानगरपालिकामे किछु स्थान असुरक्षित आ अस्तव्यस्त पड़ल अछि । जनकपुरधाम वाड नम्बर १ , १६, १७ आ १९के जोडएबला पुल्चौकस्थित सड़क आ पूल निर्माणक काज अधुरा अछि । सडकके कातमे रहल ट्रान्सफर्मर आ विद्युतक पोलसभ कखन खसि पड़त तकर कोनो ठेकान नहि ।
स्थानीय रामदिनेश चौधरी कहैत छथि ‘ जनकपुरधाममे सरकारे नहि अछि, बिना सरकारक ई राज्य अछि जे ई स्थानक दूरावस्था वर्षोसँ अछि ।’ नहि जानि स्थानीय सरकार कोन सामाग्री वा वस्तुक प्रयोग कऽ ई पूलक निर्माण करा रहल अछि । जे अखनधरि आधासँ उपर बनबे नहि करैत अछि ।
जनकपुधाममे बहुतो स्थानक सडक बनल मुदा पुल्चौकके नहि दोसर स्थानीय रामानन्द साहक कहब छन्हि । सडक तऽ सडक विद्युतक पोलोसभके स्थिति कोनो बढियाँ नहि अछि, कखन खसि पड़त तकर डर हमरा लागले रहैत अछि ओ कहलन्हि । ओ आगा कहैत छथि ‘किछु महिना पहिने एहिठाम करेन्ट लागि कऽ एकटा महिस मैर गेल ।’
गाडी तऽ जाम लगिते अछि, वर्षाक समयमे थालपानिक समस्या सेहो बढि जाइत अछि ओतुका स्थानीयक उपराग अछि । आधा अधुरा बनल पूलपर गाडी लऽ कऽ जाएमे सेहो खतरासँ खाली नहि रहैत अछि । वर्षोसँ निर्माणधिन पूल अखनधरि पूरा नहि बनए सकल हुनक प्रश्न छन्हि ।
धनुषाक प्रमुख नाकामेसँ पुल्चोक सेहो पड़ैत अछि तखनो एहि चौकक स्थिति खराब अछि स्थानीय सहदेव मुखिया कहैत छथि । हमसभ बेर बेर पहल करैत छी, कतेको बेर चक्काजाम कएने छी, स्थानीय सरकारक प्रतिनिधि अबैत छथि आ देखि कऽ चलि जाइत अछि, एहि दुरावस्थाक जिम्मेबार मात्रे राज्य नाहि किछु स्थानीय सेहो रहल आरोप हुनक छन्हि । किए तऽ सडक विस्तारक क्रममे जिनकर घर वा जमिन पडैत अछि ओहेसभ काजमे अवरोधक श्रृजना करैत आबि रहल ओ कहलन्हि ।
