जनकपुरधाम ।
वर्षाको अभावले रोपाइँ प्रभावित बनेपछि सर्लाहीको ईश्वरपुर नगरपालिका–९ रामनगरका थारु समुदायले वर्षा आह्वान गर्ने परम्पराअनुसार दुई सांसदलाई हलो जोत्न लगाएका छन् ।
साउनको मध्य भइसके पनि लगातार पानी नपरेपछि स्थानीयले प्रतिनिधिसभा सदस्य रामप्रकाश चौधरी र प्रदेशसभा सदस्य उर्मिला सिंह थारुलाई परम्परागत ढंगले ’नियन्त्रणमा’ लिएर हलो जोत्न बाध्य बनाएका हुन् ।
थारु समुदायमा लामो समयसम्म पानी नपरेमा गाउँका अगुवालाई खेतमा लगेर हलो जोत्न लगाउने परम्परा रहिआएको छ । सांसद चौधरी र थारु दुवै रामनगरकै स्थानीय बासिन्दा हुन् ।
हलो जोत्ने क्रममा गाउँकी महिलाहरूले काँधमा जुवा राखी प्रतीकात्मक रूपमा सघाएका थिए । समुदायले यस कार्यलाई वर्षा आह्वान गर्ने सांस्कृतिक विधिका रूपमा निर्वाह गरेका हुन् ।
