मलंगवा ।
सर्लाहीको ब्रह्मपुरी गाउँपालिका–७ मोहनजंगस्थित सडकमा स्कुल बसको च्यापिएर एक विद्यार्थीको मृत्यु भएको छ ।
ईश्वरपुर नगरपालिका–१ चौलिखास्थित टेमुको एकेडेमी स्कुलको बसले ठक्कर दिएर सोही स्कुलमा अध्ययनरत ५ वर्षीया छात्राको निधन भएको हो ।
मृत्यु हुनेमा ब्रहम्पुरी गाउँपालिका-७ मोहनजंग बस्ने रमेश महतोको छोरी आशिका रहेको प्रहरीले जनाएको छ ।
बसबाट झर्ने क्रममा बसको पछाडिको चक्काले च्यापिएर उनको टाउकोमा चोट लागेको थियो ।
तत्कालै उनलाई जीवन नारायण अस्पताल बयलबासमा उपचारका लागि लगिएको थियो । चिकित्सकले उनलाई दिउँसो ४ बजेर ४० मिनेटमा मृत घोषणा गरेको प्रहरीले जनाएको छ ।
मृतकको शव पोस्टमार्टमका लागि मलंगवा अस्पतालमा राखिएको छ ।
