जनकपुरधाम ।
महोत्तरीको गौशाला नगरपालिका–५ स्थित गोरु बजारको ठेक्कालाई लिएर उत्पन्न विवादले उग्र रूप लिँदा दुई पक्षबीच झडप भएको छ । झडपमा ४ जना घाइते भएका छन् । घाइतेमध्ये दुई जनाको अवस्था गम्भीर रहेको जनाइएको छ ।
सोमबार बिहान ठेक्का रकम संकलनका क्रममा भएको भनाभनले झडपको रूप लिँदा वडा नं. २ का अध्यक्ष श्याम कुमार मण्डल, स्थानीय बिपिन साह, विजय यादव र सुरेन्द्र महतो घाइते भएका हुन् । घाइतेमध्ये वडा अध्यक्ष मण्डल र विजय यादवको अवस्था गम्भीर रहेकाले थप उपचारका लागि काठमाडौं रेफर गरिएको छ ।
स्थानीयका अनुसार गोरु बजारको ठेक्का सम्बन्धमा गौशाला नगरपालिका र निगौल गाई गौशालाले छुट्टाछुट्टै ठेक्का लगाएकाले ठेक्का रकम उठाउने विषयमा विवाद उत्पन्न भएको हो । रकम संकलनको प्रयासका क्रममा विवाद चर्कँदै गएर हात हालाहालसम्मको अवस्था सिर्जना भएको बताइएको छ ।
झडपपछि स्थिति तनावपूर्ण बनेपछि सुरक्षाका लागि प्रहरी बल परिचालन गरिएको थियो । अहिले बजार क्षेत्रमा सुरक्षाकर्मीहरूको बाक्लो उपस्थिति रहेको र अवस्था सामान्य रहेको प्रहरीले जनाएको छ ।
