जनकपुरधाम ।
आज यो वर्षको पहिले साउने सोमबार । हुनत पूर्णिमाको हिसाबले दोस्रो र संक्रान्तिको हिसाबले पहिलो सोमवार । जनकपुरधामको कपिलेश्वरनाथ, कुपेश्वरनाथ सहित अधिकांश शिवालयहरुमा श्रद्धालुहरुको बिहानैदेखि भीड लागेको छ ।
भूतनाथ, शिव चौकको शिव मन्दिरमा पनि बिहानैदेखि भक्तजन पूजा गरिरहेका छन् । जनकपुरधाम ४ को सरस्वतीनगर स्थित चदराको मन्दिरमा पनि पूजा गर्नेको भीड लागेको छ ।
साउनको सोमबारलाई भगवान शिवको प्रिय बार मानिने भएकाले यस दिन श्रद्धालुहरु व्रत, पूजापाठ, दानलगायत कार्य गर्छन् ।
साउने सोमबारको दिन शिवको पूजा गर्दा सुख, शान्ति, समृद्धि र परिवारको कल्याण हुने धार्मिक विश्वास छ ।
साउन महिनाको हरेक सोमबार व्रत बसेर शिवको पूजा गर्दै आएकाहरुले अन्तिम सोमबार विधिपूर्वक व्रत समाप्त गर्दछन् ।
