काठमाडौँ ।
निर्वाचन आयोगले प्रतिनिधि सभासदस्यका लागि रूपन्देही- ३ मा हुने उपनिर्वाचनका लागि असोज २१ गते मनोनयन दर्ता हुने भएको छ।
आयोगले निर्वाचन कार्यक्रम स्वीकृत गर्दै तालिका सार्वजनिक गरेको हो। निर्वाचन कार्यक्रम अनुसार, उम्मेदवारको मनोनयन दर्ता बिहान १० बजेदेखि बेलुका ५ बजेसम्म निर्वाचन अधिकृतको कार्यालयमा हुनेछ। सोही दिन बेलुका ५ बजेदेखि ७ बजेसम्म उम्मेदवारको प्रारम्भिक सूची प्रकाशित गरिनेछ।
त्यस्तै उम्मेदवारको विरोधमा उजुरी दिने अवधि असोज २२ गते बिहान १० बजेदेखि दिउँसो ३ बजेसम्म तोकिएको छ। उजुरीको जाँचबुझ र निर्णय असोज २२ गते दिउँसो ३ बजेदेखि असोज २३ गते बेलुका ५ बजेसम्म हुनेछ। अन्तिम उम्मेदवारको नामावली असोज २३ गते बेलुका ५ बजेदेखि ७ बजेसम्म प्रकाशित गरिनेछ।
रूपन्देही–३ मा राष्ट्रिय प्रजातन्त्र पार्टी(राप्रपा) का सांसद दीपक बोहराको निधनपछि प्रतिनिधि सभा सदस्यको पद रिक्त भएको थियो। रिक्त पदपुर्ति गर्न कार्तिक १७ गते उपचुनाव हुँदैछ।
