स्नेहा निधि
जनकपुरधाम ।
उद्योग, वाणिज्य तथा पर्यटन मन्त्रालय र नेपाल होटेल तथा पर्यटन व्यवसायी महासंघ मधेश प्रदेश समितिद्वारा आयोजित पर्यटन प्रचार–प्रसार तथा अन्तरक्रिया कार्यक्रम आज एक समारोहका बिच सम्पन्न भएको छ ।
मधेश प्रदेशका मुख्यमन्त्री सतिशकुमार सिंहले समारोहको उदघाटन गर्दै पर्यटनको माध्यमले मधेशको विकास गर्ने बताउनुभयो । विकासका लागि सबै आधारभूत तत्व चाहियो तर मधेशमा जुन रुपमा ऐतिहासिक स्थलहरु रहेको छ त्यसको प्रचार प्रसार मात्र गर्न सक्यो भने लाखो भारतीय र अन्य देशका पर्यटक ल्याउने बताउँदै उहाँले भन्नुभयो – बाहिरबाट आउने पर्यटकलाई अतिथित्वमा कन्जुसी हुनुहुँदैन ।
मिथिला र अयोध्याको सम्बन्धको चर्चा गर्दै मुख्यमन्त्रीले अयोध्या आउने पर्यटकलाई जनकपुरधाम र यो क्षेत्रमा ल्याउने आवश्यकता रहेको उल्लेख गर्नुभयो ।
जनकपुरधाम उद्योग वाणिज्य संघका अध्यक्ष सुरेन्द्र भण्डारीले पर्यटकलाई ल्याउन हामी कुरा गरिरहेछु अर्को तर्फ महोत्तरीको भिट्ठामोडमा पर्यटकलाई कुटपीट गर्ने गरिन्छ हामी कस्तो आतिथित्वको कल्पना गरिरहेको प्रश्न गर्नुभयो । पर्यटकसँग दुव्र्यवहार गर्नेलाई कडा कारवाहीको समेत उहाँले माँग गर्नुभयो ।
महासंघको मधेश प्रदेशका अध्यक्ष हिरा गौतमको अध्यक्षतामा भएको समारोहमा जनकपुरधामका होटल व्यवसायी दशरथ साहलाई कदरपत्र प्रदान गरियो ।
यसैबिच होटेल तथा पर्यटन व्यवसायी संघ धनुषा जिल्लाको अध्यक्षमा रुपेश सिंहलाई सर्वसम्मती रुपमा चयन गरिएको छ ।
