काठमाडौं ।
त्रिभुवन विश्वविद्यालयमा आंशिक प्राध्यापकहरूले उपकुलपति, शिक्षाध्यक्ष, रजिस्ट्रार र सेवा आयोगको कार्यालयमा लगाएको ताला खोलेका छन् ।
सर्वोच्च अदालतले बुधबार गृह मन्त्रालय, प्रहरी कार्यालय र प्रशासनलाई ताला खोल्न आदेश दिएपछि शुक्रबार बिहान आंशिक प्राध्यापकहरूले आफैं ताला खोलेका हुन् । ३० जेठदेखि फास्ट ट्रैकबाट प्राध्यापक नियुक्तिको विरोधमा तालाबन्दी गरिएको थियो ।
शुक्रबार त्रिविको ६६औँ वार्षिकोत्सवको दिन भएकाले कार्यक्रम सुरु हुनुअघि नै ताला खोलिएको हो । रजिस्ट्रार प्रा.डा. केदारप्रसाद रिजालले प्राध्यापकहरूद्वारा ताला खोलिएको जानकारी दिएका छन् ।
यता, स्नातक पहिलो वर्षको भर्ना खुलाउन माग गर्दै नेविसंघ निकट विद्यार्थीहरूले लगाएको ताला भने अझै खुलेको छैन । उनीहरूले उपकुलपतिको कार्यकक्षमा तोडफोडसमेत गरेका थिए ।
त्रिविले तोडफोडमा संलग्नलाई कारबाही गर्न माग गर्दै जाहेरी दिए पनि पक्राउ परेका दुई जनालाई छोडिएको छ र अहिलेसम्म कारबाही भएको छैन ।
अहिले उपकुलपति, रेक्टर र रजिस्ट्रार बाहिरै बसेर काम गरिरहेका छन् । विद्यार्थीहरूले आफैं ताला नखोले अदालतको आदेश अनुसार प्रशासनमार्फत ताला खोल्ने तयारी भइरहेको छ ।
