काठमाडौं ।
मधेस केन्द्रित सात सम्मिलित संघीय लोकतान्त्रिक मोर्चाको बैठक बसेको छ । नागरिक उन्मुक्ति पार्टीका संरक्षक रेशम चौधरीको अध्यक्षतामा मोर्चाको बैठक बसेको हो ।
बैठकमा पछिल्ला विकसित राजनीति घटनाक्रम, मोर्चाको आगामी कार्यायोजनालगायतको विषयमा छलफल चलिरहेको छ । बैठकमा कात्तिकको दोस्रो साता हुने भनिएको उपनिर्वाचनबारे पनि छलफल भएको चौधरीले बताए ।
प्रतिनिधिसभाका सदस्यको रुपन्देही क्षेत्र नं. ३ र गण्डकी प्रदेशसभाको मनाङ क्षेत्र नं. १ (२) को रिक्त सदस्यको उपचुनावकोको मिति आयोगले तोक्दैछ ।
उनले भने, ‘कांग्रेस, एमाले, रास्वपाले आन्तरिक रूपमा तयारी थालिसकेका छन् । कात्तिकभित्रै चुनाव हुने गरी आयोगले मिति तोक्दैछ । अन्य दलहरू मैदानमा गइसकेका छन्, तर हाम्रोबाट कसैले तयारी थालेको पाइएन । त्यसैले छलफल गरौँ भनेर बैठक राखेका हौँ ।’
गएको निर्वाचनमा नाउपाले उम्मेदवारी दिएर सम्मानजनक मत पाएको भन्दै उपनिर्वाचनको लागि रुपन्देहीमा पार्टीको उम्मेदवार करिब तय भइसकेको बताए । उनले मोर्चा गठन भइसकेकाले सबै दलहरुबीच सहमतिमा अघि बढ्न प्रस्ताव राखे ।
