काठमाडौँ ।
आज असार ६ गतेदेखि मनसुन देशभर फैलिएको जल तथा मौसम विज्ञान विभाग, मौसम पूर्वानुमान महाशाखाले जनाएको छ।
मौसम महाशाखाले आज मनसुन आगमन बुलेटिन-३ जारी गरी मनसुन प्रणाली मुलुकभरि नै विस्तार भएको जानकारी दिएको हो।
बुलेटिनमा भनिएको छ: यस वर्षको मनसुन प्रणाली आज मिति २०८२/०३/०६ (२० जुन २०२५) गतेका दिन देशभर फैलिएको छ।
नेपालमा यस वर्ष मनसुन जेठ १५ गते (मे २९ तारिख) पूर्वी क्षेत्र कोसी प्रदेशमा प्रवेश गरेको थियो भने त्यसको १४ दिनपछि जेठ २९ गते मधेस प्रदेश, बागमती प्रदेश तथा गण्डकी प्रदेशका केही स्थान र लुम्बिनी प्रदेशका पूर्वी क्षेत्रका थोरै स्थानसम्म विस्तार भएको थियो।
आजदेखि भने देशका सबै स्थानमा मनसुन पुगेको मौसम महाशाखाले जनाएको छ।
मौसमविद्का अनुसार नेपालमा मनसुन साधारणतया जुन १३ तारिखमा प्रवेश गरी एक हप्ताभित्र देशभर विस्तार हुन्छ।
तर यस वर्ष सरदर मितिभन्दा १५ दिन छिटो नेपाल प्रवेश गरेको मनसुनलाई देशैभर फैलिन २३ दिन लागेको छ।
