जनकपुरधाम ।
मधेस प्रदेश सरकारले आर्थिक वर्ष २०८२/0८३ का लागि ल्याउन लागेको बजेट मन्त्रिपरिषद्को बैठकबाट स्वीकृत भएको छ । प्रारम्भिकरूपमा तय गरिएको रकमभन्दा २ अर्ब रुपैयाँ थप गर्दै करिब ४६ अर्बको बजेट स्वीकृति दिइएको बताइएको छ ।
आज अपरान्ह ४ बजे प्रदेशसभामा बजेट प्रस्तुत गर्ने तयारी भए पनि मन्त्रिपरिषद्को बैठक ढिलो सकिएकाले बजेट पेस गर्न ढिलाइ भएको हो । अब अर्थ मन्त्री सुनिल कुमार यादवले बजेट प्रदेशसभामा प्रस्तुत गर्नेछन् ।
बजेटमा कृषि, शिक्षा, स्वास्थ्य, रोजगारी सिर्जना र पूर्वाधार विकासलाई प्राथमिकतामा राखिएको जनाइएको छ । सरकारले बजेटमार्फत प्रदेशको समावेशी विकास, आर्थिक सशक्तीकरण र सेवा प्रवाहमा सुधार गर्ने लक्ष्य लिएको छ ।
