काठमाडौं ।
दलीय भागबण्डा र अव्यवस्थाको आरोप खेपिरहेको नेपाल रेडक्रस सोसाइटीलाई रेडक्रसको अन्तर्राष्ट्रिय महासंघ (आईएफआरसी) ले सुधारको अन्तिम मौका दिएको छ ।
आईएफआरसीको गभर्निङ बोर्डले १२ जुन (विहीबार) का दिनको बैठकमा नेपाल रेडक्रसको वर्तमान नेतृत्व व्यवस्थाप्रति चासो व्यक्त गर्दै नयाँ कार्यसमिति चयन, विधान संशोधन र नेतृत्व परिवर्तनका लागि नेपाल सरकारको प्रतिबद्धता स्वीकार गर्दै दुई महिनाको समय दिएको हो ।
जेनेभाबाट शुक्रबार नेपाल रेडक्रस सचिवालयलाई पठाइएको पत्रमा भनिएको छ, ‘यदि अबको दुई महिनाभित्र कुनै ठोस प्रगति देखिएन भने तत्काल निलम्बनको प्रक्रिया अघि बढाइनेछ ।’
आईएफआरसीले तत्काल कुनै प्रतिबन्ध नलगाउने निर्णय गरे पनि सुधार नआए कडा कारबाही गरिने स्पष्ट चेतावनी दिएको छ । विगत केही समयदेखि नेपाल रेडक्रसमा दलीय हस्तक्षेप, अनियमितता र आन्तरिक विभाजनबारे गम्भीर प्रश्न उठ्दै आएका छन् । अन्तर्राष्ट्रिय महासंघको तर्फबाट आएको यो चेतावनीलाई अन्तिम अवसरका रूपमा हेरिएको छ ।
