जनकपुरधाम ।
जनकपुरधाम उपमहानगरपालिका–२३ स्थित शहीद दुर्गानन्द झाको सालिकमा चप्पल प्रहार गरी त्यसको भिडियो सामाजिक सञ्जालमा अपलोड गर्ने एक व्यक्ति पक्राउ परेका छन् । पक्राउ परेका व्यक्तिको नाम रतन महतो (उमेर ४४), निवासी जनकपुरधाम–२३ लादो गाउँ, रहेको जिल्ला प्रहरी कार्यालय धनुषाले जानकारी दिएको छ ।
प्रहरीका अनुसार महतोले केही दिनअघि शहीद झाको सालिकमाथि चप्पल प्रहार गरी भिडियो बनाएका थिए र उक्त भिडियो सामाजिक सञ्जालमा सार्वजनिक गरेका थिए । यस कार्यप्रति सामाजिक सञ्जालमा व्यापक विरोध प्रकट गरिएको थियो । शहीद झाका अनुयायीहरू, स्थानीय संघसंस्था, युवा क्लबहरू तथा विभिन्न राजनीतिक दलहरूद्वारा दोषीलाई कडाभन्दा कडा कारबाही गर्न माग गरिएको थियो ।
घटनापछि जिल्ला प्रहरी कार्यालय धनुषाले अनुसन्धान थालेको थियो । अनुसन्धानको क्रममा महतो जेठ २९ गते आफ्नै गाउँ लादोमा डुलिरहेको अवस्थामा पक्राउ परेको प्रहरी स्रोतले जनाएको छ । पक्राउ परेका महतोमाथि आवश्यक कानुनी कारबाही अगाडि बढाइएको र थप अनुसन्धान जारी रहेको जनाइएको छ ।
