जनकपुरधाम ।
नेपाली कांग्रेसका सभापति एवं पूर्व प्रधानमन्त्री शेरबहादुर देउवाले मधेस प्रदेशको नाम जनक प्रदेश वा जानकी प्रदेश भएको भए राम्रो हुन्थ्यो बताएका छन् ।
मैथिली विकास कोषको नवनिर्मित भवनको उद्घाटन गर्दै देउवाले जनकपुरधामको ऐतिहासिक, धार्मिक तथा सांस्कृतिक विशेषता उल्लेख गर्दै यस्तो प्रतिक्रिया दिएका छन् । उनले भने, ‘जनकपुरधाम सीताको जन्मस्थल मात्र होइन, सीतारामको विवाहस्थलसमेत हो । यसले नेपाल–भारतबीचको सांस्कृतिक सम्बन्धलाई अझ बलियो बनाउँदै आएको छ । प्रदेशको नाम यदि जनक वा जानकी प्रदेश राखिएको भए उपयुक्त हुने थियो मैले भनेकै हो ।’
प्रदेशको नामाकरण भएको तीन वर्षपछि देउवाले सार्वजनिक रुपमा प्रतिक्रिया दिँदै, स्थानीय इतिहास र सांस्कृतिक पहिचानलाई प्रतिबिम्बित गर्ने नाम आवश्यक रहेको धारणा राखेका हुन् ।
नामाकरण प्रक्रियाका क्रममा नेपाली कांग्रेसले यस प्रदेशको नाम मिथिला प्रदेश हुनुपर्ने पक्षमा उभिएको थियो ।
यद्यपि, कार्यक्रममा देउवाले समसामयिक राजनीतिक विषयमा भने टिप्पणी गरेका थिएनन् ।
