काठमाडौँ ।
नेकपा एमालेले संसदीय दलको बैठक बोलाएको छ । बैठक दिउँसो १ बजे लोत्से हल बानेश्वरमा बस्न लागेको हो ।
बैठकमा संसदमा प्रस्तुत भएको बजेट र समसामयिक विषयमा छलफल हुने मुख्य सचेतक महेश बर्तौलाले बताए । जेठ १५ गते बजेट पेश भए पनि विपक्षीहरूले संसदको अवरोध जारी नै राख्ने अडान लिएका छन् । भिजिट भिसा प्रकरणमा मुछिएका गृहमन्त्री रमेश लेखकले राजीनामा नदिएसम्म अवरोध नहट्ने उनीहरूको अडान छ ।
यता नेकपा माओवादी केन्द्र संसदीय दलको बैठक पनि आज बोलाइएको छ । आज १२ बजे सिंहदरबारमा दलको बैठक बस्नेछ । बैठकमा संसदमा प्रतिपक्षको भूमिकालाई थप प्रभावकारी कसरी बनाउन सकिन्छ भन्ने विषयमा छलफल हुने बताइएको छ । प्रमुख प्रतिपक्षी दल नेकपा माओवादी केन्द्रलगायत प्रतिपक्षी दलहरूले गृहमन्त्री रमेश लेखकको राजीनामा माग गर्दै संसद अवरोध गरिरहेका छन् ।
त्यस्तै राष्ट्रिय स्वतन्त्र पार्टी (रास्वापा)ले केन्द्रीय सचिवालय र संसदीय दलको बैठक बोलाएको छ । सचिवालय बैठक दिउँसो १ बजे र संसदीय दलको बैठक तीन बजेका लागि बोलाइएको हो ।
बैठकमा समसामयिक राजनीति, भिजिट भिसा र गृहमन्त्रीको संलग्नता, पार्टीको गतिविधि लगायतका विषयमा छलफल हुने छ । बैठक पार्टी कार्यालयमा बस्ने भएको हो ।
