एजेन्सी ।
नवनिर्वाचित क्याथोलिक ईसाई (क्रस्चियन) धर्मगुरु पोप लियोले आइतबार भ्याटिकन सिटीबाट पहिलोपटक सम्बोधन गरेका छन् ।
आफ्नो पहिलो सम्बोधनमा उनले विश्वका शक्तिशाली देशहरूलाई ’अब युद्ध नगर्न’ अपिल गरेका छन् ।
पोप लियो युक्रेनमा शान्ति र गाजामा युद्धविरामबारे पनि बोले। साथै उनले भारत र पाकिस्तानबीच भएको युद्धविरामको पनि स्वागत गरे । उनले गाजामा भइरहेका घटनाले आफूलाई निकै दुःखी बनाएको बताए ।
पोप लियोले भारत र पाकिस्तानबीच दिगो मेलमिलापको आशा व्यक्त गरे । अनि युक्रेनका लागि ‘साँचो, वास्तविक र दिगो शान्ति’को कामना गरे । पोप फ्रान्सिसको मृत्युपछि पोप लियो हालै क्याथोलिक चर्चको नयाँ पोप निर्वाचित भएका हुन् ।
आइतबारको आफ्नो सम्बोधनमा उनले पोप फ्रान्सिसजस्तै शान्तिका लागि अपिल गरे र भने, ‘विश्वका सबै शक्तिशाली मानिस सुन, अब युद्ध होइन ।’ उनले थपे, ‘दोस्रो विश्वयुद्ध समाप्त भएको ८० वर्ष भइसक्यो, तर अब हामी विश्वका साना भागहरूमा तेस्रो विश्वयुद्धको त्रासदीको सामना गरिरहेका छौँ ।’
