सिरहा ।
सिरहाको गोलबजारस्थित बर्धमान अस्पतालका एक सुत्केरीको ज्यान गएको छ । मिर्चैया नगरपालिका-११ सीतापुरकी २७ वर्षीया रामकाशी यादवको शनिबार बिहान मृत्यु भएको हो ।
उनलाई शुक्रबार बिहान व्यथा लागेपछि परिवारजनले बर्धमान अस्पताल लगेका थिए । अस्पतालमा दिउँसो १२ बजेतिर शल्यक्रिया गरेर बच्चा निकालेका थिए । यसअघि दुई छोरीकी आमा रहेकी उनले छोरालाई जन्म दिएकी थिइन् । जन्मिएको बच्चा सकुशल छ । सन्तान आगमनको खुसी घरपरिवारमा छाएको थियो तर सो खुसी धेरै बेर टिकेन ।
शल्यक्रियाको क्रममा अत्यधिक रक्तश्राव भएपछि रामकाशीको स्वास्थ्य अवस्था बिग्रँदै जाँदा परिवारजनले बाहिर लान खोजेका थिए । रिफर गरिदिन पटकपटक आग्रह गर्दा पनि यतै ठीक भइहाल्छ भनेर अस्पतालले ढाढस दिएर राखे । ढिलो रिफर गर्दा गोलबजारबाट बिराटनगर लाने क्रममा बाटोमै उनको मृत्यु भएको हो ।
शनिबार बिहान साढे ५ बजेको समयमा बिराटनगरस्थित न्यूरो अस्पतालले उनलाई मृत घोषणा गरेको मृतकका पति सन्त यादवले बताए ।
अस्पतालमा कार्यरत डाक्टरहरूको लापरबाहीले सुत्केरीको ज्यान गएको भन्दै परिवारजन अस्पताल अगाडि राजमार्गमा शव राखेर प्रदर्शनसमेत गरेका छन् । पीडित परिवारको प्रदर्शनपछि प्रहरीले अस्पतालका डाक्टरसहित ३ जनालाई सोधपुछका लागि बोलाइएको जिल्ला प्रहरी कार्यालय सिरहा प्रवक्ता तथा डिएसपी विरेन्द्र पासवानले जानकारी गराए ।
उनका अनुसार शवलाई पोष्टमार्टमका लागि पठाउने तयार भइरहेको छ । थप अनुसन्धानका लागि अस्पतालका डकुमेन्ट पनि मगाएको उनले बताए ।
