जनकपुरधाम ।
सिरहामा युवाहरूले प्रादेशिक अस्पताल सिरहामा चरम भ्रष्टाचार, अनियमितता, सेवामा लापरबाही तथा बिरामीमाथिको शोषणविरुद्ध आवाज उठाउँदै स्थानीय युवाहरूले अस्पताल सुधारका लागि आन्दोलन सुरु गरेका छन् ।
यसै क्रममा, युवाहरूको एक समूहले अस्पतालका अध्यक्ष र मेडिकल सुपरिटेन्डेन्ट (मेसु) सुनिल कुशवाहाको कार्यकक्षमा तालाबन्दी गरेका छन् । आन्दोलनकारीहरूका अनुसार अस्पतालमा व्यापक सुधार गर्नुपर्ने भन्दै १७ बुँदे मागसहित तीन दिन अगाडि अल्टिमेटम दिइएको थियो । तर, मागप्रति कुनै चासो नदिएको भन्दै बाध्य भएर तालाबन्दी गर्नुपरेको उनीहरूको भनाइ छ ।
सिरहाली युवाहरूले अस्पतालमा व्यापक अनियमितता भएको गम्भीर आरोप लगाएका छन् । उनीहरूका अनुसार अस्पतालमा बिरामीले पाउनु पर्ने निःशुल्क औषधी र सेवा सुविधाबाट वञ्चित भइरहेका छन् । अस्पताल प्रशासन औषधी खरिदमा समेत कमिसनको चलखेलमा मुछिएको आरोप लागेको छ ।
