जनकपुरधाम ।
उच्च अदालत जनकपुरले मोडेल कलेजमा कानून संकायमा अध्ययनरत विद्यार्थीहरुसंग न्यायिक सम्वाद कार्यक्रम गरेको छ । अदालती प्रकृयाका साथै अदालतमा सर्वसाधारणको पहुँच लगायत विषयमा जानकारी गराउने अभिप्रायले मोडेल कलेजको बीएएलएलबीमा अध्ययनरत विद्यार्थी, कानून तर्फ नै कक्षा ११मा अध्ययनरत विद्यार्थी तथा मोडेल कलेजकै बीबीएस दोस्रो तथा तेस्रो वर्षमा अध्ययनरत विद्यार्थीहरुसंग उच्च अदालत जनकपुरले न्यायिक सम्वाद कार्यक्रम गरेको हो ।
कार्यक्रममा उच्च अदालत जनकपुरका मुख्य न्यायाधिश श्रीकान्त पौडेलले अदालती प्रकृयाको विषयमा आमजनमा भ्रमका कारण भयको वातावरण रहेको बताए । उनले यो भ्रमलाई चिर्ने उद्देश्यले यस प्रकारको कार्यक्रम उच्च अदालतले गर्दै आईरहेको समेत बताए । कार्यक्रममा अदालतले प्रवाह गर्ने सेवा, सेवा प्रवाहका प्रक्रिया एवं अदालतप्रति समुदायको जिज्ञासाबारे विद्यार्थीहरुले राखेका प्रश्नहरुको जवाफ मुख्यन्यायाधिश पौडेलले दिएका थिए ।
कार्यक्रममा मोडेल कलेजका संस्थापक वीरेन्द्र साह, उच्च अदालतका न्यायाधिश महेन्द्रनाथ उपाध्याय, रजिष्ट्रार प्रेम खडका, उपरजिष्ट्रार सुशिलकुमार यादव लगायतले बोलेका थिए ।
यस मोडेल कलेजका संस्थापक साहले उच्च अदालतका मुख्यन्यायाधिश पौडेल, न्यायधिश उपाध्याय, रजिष्ट्रार खडका सहितका पदाधिकारीहरुलाई दोसल्ला ओढाएर सम्मान गरेका थिए ।
