काठमाडौं ।
नेकपा माओवादी केन्द्रका उपाध्यक्ष कृष्णबहादुर महराले मुलुकको परिस्थिति अत्यन्तै जटिल अवस्थामा पुगेको बताएका छन् ।
शनिबार दाङ–काठमाडौं सम्पर्क समन्वय समितिको तेस्रो अधिवेशनलाई ललितपुरको गोदावरीमा सम्बोधन गर्ने क्रममा उनले अहिले देशमा राजावादी र दलहरूबीचमा द्वन्द्व चलिरहेको भन्दै यसलाई गम्भीर चुनौतीको रुपमा लिनुपर्ने बताए ।
उनले हिजोमात्रै राज्यको एउटा प्रमुख अंगका प्रमुखसँग कुरा गर्दा पनि अवस्था चुनौतीपूर्ण रहेको ब्रिफिङ पाएको जिकिर गरे ।
‘परिस्थिति जटिल छ । निकै जटिल छ । अस्ति एयरपोर्टमा राजाको स्वागतका लागि जम्मा भएका मान्छेको ताँती देख्नुभयो । राजावादी र पार्टीहरूको बीचमा ठूलो द्वन्द्व छ,’ महराले भने, ‘मैले केही दिनअघि हिजोमात्रै राज्यको एउटा प्रमुख अंगको प्रमुखसँग कुरा गरेँ । धेरै ठूलो गम्भीर चुनौती छ ।’
उनले देशभित्र मात्रै नभइ अन्तर्राष्ट्रिय परिस्थिति पनि सामान्य नभएको बताए ।
‘अब के गर्ने ? अन्तर्राष्ट्रिय स्थिति पनि जटिल छन् । भारत, अमेरिका र चीनले गम्भीर रुपमा नेपाललाई हेरिरहेका छन् । सामान्य रुपमा होइन,’ उनले भने ।
तर, सरकारमा रहेका दलहरू भने दैनिक लुटमा केन्द्रित रहेको उनको भनाइ थियो ।
‘सत्तामा रहेका पार्टीहरू एमाले र कांग्रेस दिनप्रतिदिन लुटमा केन्द्रित छन् । सरकारमा भएका पार्टीहरू कुनै सार्वजनिक कार्यक्रममा उत्रन सकेका छैनन् । यो जटिल परिस्थितिमा के हुन्छ भन्न सकिँदैन्,’ महराले भने ।
उनले जनतासँग जोडिएर जनताकै बीचबाट राजनीतिक निकास खोज्नुपर्ने पनि बताए ।
‘हामी जनतासँग जोडिनुपर्छ । जनताकै बीचबाट राजनीतिको निकास खोजिनुपर्छ । अरु विदेशी ताकतहरूको बीचबाट खोज्न हुँदैन,’ महराले भने ।
फरक प्रसंगमा पछिल्लो पटक आफ्नो पार्टीले चलाएको अभियानका कारण पार्टीमा आकर्षण बढेको महराको दाबी छ ।
‘पार्टीमा आकर्षण बढेको छ । तर संगठित हुन अझै बाँकी छ । संगठित किन हुँदैन भने पार्टीभित्र एकतावद्ध हुन जरुरी छ । एकताको निमित्त नेताको केन्द्रीकरण हुन अहिले पनि आवश्यक छ,’ महराले भने ।
कार्यक्रममा माओवादी केन्द्र स्थायी समिति सदस्य रेखा शर्मा, यशाेदा गुरुङ, राष्ट्रियसभा सदस्य जगप्रसाद शर्मा, प्रतिनिधि सभा सदस्य नारायणी शर्मा, माओवादी क्न्द्रका नेता हेमराज शर्मा डायमण्ड लगायतको उपस्थिति थियो ।
अधिवेशनले निमेष कुमार ओलीको नेतृत्वमा २३ सदस्यीय नयाँ कार्यसमिति सर्वसम्मत चयन गरेको छ ।
