एजेन्सी ।
बंगलादेशी क्रिकेट टोलीका प्रभावशाली अलराउण्डर महमुदुल्लाहले एकदिवसीय अन्तर्राष्ट्रिय क्रिकेटबाट सन्यासको घोषणा गरेका छन् । ३९ वर्षीय महमुदुल्लाह बंगलादेशका लागि १० हजारभन्दा बढी अन्तर्राष्ट्रिय रन बनाउने खेलाडी हुन् ।
महमुदुल्लाहले हालै पाकिस्तानमा सम्पन्न आईसीसी च्याम्पियन्स ट्रफीको नवौं संस्करण पनि खेलेका थिए । उनले सामाजिक सञ्जालमार्फत आफूले एकदिवसीय अन्तर्राष्ट्रिय क्रिकेटबाट सन्यास लिएको जानकारी सार्वजनिक गरेका हुन् ।
महमुदुल्लाहले टेस्ट र टी–२० अन्तर्राष्ट्रिय क्रिकेटबाट भने यसअघि नै सन्यास लिईसकेका थिए । उनले टेस्ट क्रिकेटबाट सन् २०२१ मा र टी–२० अन्तर्राष्ट्रिय क्रिकेटबाट सन् २०२४ मा सन्यासको घोषणा गरेका थिए ।
महमुदुल्लाह बंगलादेशका लागि चौथो सर्वाधिक अन्तर्राष्ट्रिय रन बनाउने व्याट्सम्यान हुन् । बंगलादेशका लागि उनीभन्दा बढी अन्तर्राष्ट्रिय रन मुशफिकुर रहिम, शाकिब अल हसन र तमिम इकवालले मात्र बनाएका छन् ।
