जनकपुरधाम ।
मधेसको भौतिक पूर्वाधार विकास मन्त्री सरोज कुमार यादव प्रदेशको दयनिय अवस्थाप्रति आफै असन्तुष्ट रहेको बताएका छन् । मैथिली विकास कोषले आयोजना गरेको प्रादेशिक ललितकला प्रदर्शनी २०८१को उदघाटन कार्यक्रमलाई सम्बोधन गर्दै मन्त्री यादव प्रदेशको अवस्था नाजुक हुँदै गईरहेकोमा आफू असन्तुष्ट रहेको बताए । उनले आफू मधेसको सबैभन्दा ठूलो दलको संसदीय दलको नेता मात्रै होइन् मन्त्री भएपनि सन्तुष्ट हुने ठाउँ नरहेको बताए ।
म आफै मन्त्री छु, तर सन्तुष्ट छैन, मन्त्री यादवले भने ‘म केही दिन अझै यही अवस्थामा मन्त्री रहे डिप्रेशनको शिकार हुन्छु जस्तो लागिरहेको छ ।’ प्रदेशको अवस्था दयनिय हुनुमा कुनै एक पक्षको मात्रै गलती नरहेको उनको भनाई थियो ।
उनले यहाँका राजनीतिक दलहरु दोषी रहेको आरोप लगाउँदै दलहरुमा ईमान्दारिता नरहेकैले प्रदेशको यो हविगत भएको बताए । उनले भने ‘यो अवस्था देखेर कति पटक मुख्यमन्त्रीजीलाई भेटेरै भनेको छु अवस्था सुधार्न पहल गर्नुस नभए म मन्त्री पदबाट ब्याक हुन तयार रहेको भनेको छु ।’ अगाडी भने ‘यदि अवस्था सुधार नभए आफ्नो ठाउँमा हल्ला खल्ला गर्ने कोही अरुलाई पठाई दिन्छु समेत मुख्यमन्त्रीजीलाई भनेको छु ।’
प्रदेश बिग्रिदै जानुमा मात्र एक पक्षको नभई सबै पक्षको हात रहेको उनले आरोप लगाए । उनले भने ‘पत्रकारहरुको मलाई फोन आउँछ, तपाईको मन्त्रालयबाट विज्ञापन आएन निगेटिभ समाचार छापि दिन्छु भन्दै धम्काउँछन् ।’ फेरी पत्रकारहरुबाट सबै डराउँछन् पनि । यो एउटा उदाहरण मात्रै हो यस बाहेकका अन्य धेरै कारण छन् प्रदेशको अवस्था दयनिय हुँदै जानु्मा ।
मन्त्री यादवले प्रदेशलाई सुधार्न आफूहरुले पहल गरिरहेको र गरिरह्ने बताउँदै प्रदेशमा स्थिरता ल्याउनकै लागि आफूहरुले मधेसको ठूलो दल भएरपनि चौथो दलको नेतृत्व स्वीकारेको बताए ।
