एजेन्सी ।
अन्तिम तथा पाँचौँ टी–२० खेलमा भारतले इंग्ल्याण्डलाई १५० रनले हराएको छ । आइतबार राति भएको खेलमा भारतले दिएको २४८ रनको लक्ष्य पछ्याएको इंग्ल्याण्ड ११ औँ ओभरको तेस्रो बलमा अन्तिम विकेट गुमाउँदै ९७ रनमा सीमित भएको हो ।
इङ्गल्यान्डका लागि फिल साल्टले २३ बलमा ५५ रनको योगदान गरे । पार्ट टाइम बलर शिवम् दुबेको बलमा आउट हुनु अघि उनले ७ चौका र ३ छक्का प्रहार गरेका थिए । चोटबाट फर्किएका मोहम्मद सामीले ३ विकेट लिए भने दुबेको साथमा अभिषेक शर्मा र वरुण चक्रवर्तीले समान दुईदुई विकेट लिए ।
यस अघि भारतले अभिषेक शर्माको १३५ रनको सहयोगमा ९ विकेटको क्षतिमा २४७ रनको विशाल योगफल खडा गरेको थियो । १८ औँ ओभरको अन्तिम बलमा अदिल रसिदको बलमा आउट हुनु अघि उनले ५४ बलको सामना गर्दै ७ चौका र १३ छक्का प्रहार गरेका थिए । उनी खेलका म्यान अफ द म्याच घोषित भए ।
श्रङ्खला भारतले ४–१ ले जितेको छ । यस शृङ्खलामा वरुण चक्रवर्ती म्यान अफ द सिरिज घोषित भए ।
