काठमाडौँ ।
राष्ट्रिय स्वतन्त्र पार्टी रास्वपाको सचिवालय बैठक सम्पन्न भएको छ । बैठकले सभापति रवि लामिछानेसँग निरन्तर परामर्श र संवादमा पार्टीको गतिविधिलाई अघि बढाउने निर्णय गरेको छ । बैठकबारे जानकारी दिँदै संसदीय दलका उपनेता विराजभक्त श्रेष्ठले मूलतः बैठकमा सरकारले ल्याएको अध्यादेशको विषयमा छलफल भएको बताए । ‘सरकारले संसद् अब प्रस्तुत गर्नुपर्ने ६ वटा अध्यादेशमा पार्टीले कसरी धारणा राख्ने भन्ने विषयमा छलफल गर्दा फरक फरक अध्ययन गरेर प्रतिवेदनमाथि साझा धारणा बनाउने र त्यसैअनुरूप सदनमा उपस्थित हुने निर्णय भयो‚’ उनले भने ।
बैठकले पार्टीभित्र परेका उजुरीहरूलाई अनुशासन आयोगले हेर्ने निर्णय गरेको छ । यस्तै सातै प्रदेशमा गएर पार्टीले त्यहाँका उद्योगी तथा अभियन्ताहरूसँग संवाद गर्ने र उनीहरूको धारणा सुन्ने मात्र नभई सङ्गठन विस्तारको विषयमा पनि काम गर्ने निर्णय गरेको छ ।
‘सात प्रदेशका सचिवालय समितिमा रहेका साथीहरूको नेतृत्वमा सांसद र केन्द्रीय सदस्यको टोली जाने र सातै प्रदेशमा गएर उद्योगी अभियन्ताहरूसँग संवाद गर्ने तथा सङ्गठनमा भित्रको अन्यौलता अन्त्य गर्ने काम गर्ने निर्णय पनि भयो‚’ उनले भने । श्रेष्ठका अनुसार समितिबाट फागुनभित्र उक्त कार्य हुनेछ । ‘म मधेस जान्छु । यस्तै अन्य साथीहरू अन्य प्रदेश जानुहुनेछ‚’ उनले भने ।
