काठमाडौं ।
नेपाली कांग्रेसले पार्टीबाट सरकारमा गएका मन्त्रीहरूलाई सातामा दुई दिन खुला भेटघाट गर्न निर्देशन दिएको छ । सभापति शेरबहादुर देउवा निवासमा संसदीय दलको कार्यसमितिसँग मन्त्रीहरूको छलफलपछि पार्टीले उक्त निर्देशन दिएको हो ।
‘हप्तामा दुई दिन मन्त्रीहरूले खुला भेटघाट गर्न मन्त्रीहरूलाई निर्देशन दिइएको छ,’ बैठकपछि प्रमुख सचेतक श्याम घिमिरेले भने, ‘पार्टी अफिस गएर हप्तामा दुई दिन आलोपालो गरेर कार्यकर्तासँग भेटघाट गर्ने, नागरिकको गुनासो सुन्ने, सुझाव लिने र बाँकी पाँच दिन पूर्ण रुपमा मन्त्रालयको काममा केन्द्रीत हुन मन्त्रीहरुलाई निर्देशन दिइएको छ ।’
कांग्रेसका १० मन्त्री र दुई राज्यमन्त्री सरकारमा सहभागी छन् । सरकारलाई सफल बनाउन सक्रिय हुने र नियमित छलफल गर्ने निर्णय समेत गरिएको छ ।
विचाराधिन विधेयकमा सक्रियतापूर्वक काम गर्ने निर्णय भएको घिमिरेले जानकारी गराए । उनले भने, ‘आ–आफ्ना मन्त्रालयमा गति बढाउने कुरा भएको छ । बजेटका अभावले कतिपय योजना त्यत्तिकै थन्किएका छन् । चाँडो अगाडि बढाउने भन्ने कुरा भएको छ ।’
