एजेन्सी ।
भारतका चर्चित फिल्म निर्देशक श्याम बेनेगलको निधन भएको छ । समाचार एजेन्सी पीटीआईका अनुसार ९० वर्षीय बेनेगलले मुम्बईको वोकहार्ट अस्पतालमा सोमबार साँझ अन्तिम सास लिएका हुन् ।
श्याम बेनेगल २ वर्षदेखि मिर्गौलाको गम्भीर रोगबाट पीडित थिए । ’अंकुर’, ’निशान्त’, ’मन्थन’, ’भूमिका’ र ’मंडी’जस्ता फिल्म निर्देशन गरेका बेनेगललाई ७०–८० को दशकमा समानान्तर सिनेमा आन्दोलनका दिग्गज मानिन्छ । उनका फिल्ममा लैंगिक समानता, सामाजिक न्याय र राजनीतिक संघर्षजस्ता विषय थिए ।
श्याम बेनेगललाई ‘भारत एक खोज’ र ‘संविधान’ निर्माणका लागि पनि स्मरण गरिन्छ । उनलाई सन् १९७६ मा पद्मश्री र सन् १९९१ मा पद्मभूषण प्रदान गरिएको थियो । फिल्म निर्देशक बेनेगलले केही दिनअघि डिसेम्बर १४ मा आफ्नो ९०औँ जन्मदिन मनाएका थिए ।
