जनकपुरधाम ।
भगवान राम र जानकीको वैवाहिक कार्यक्रम अन्तर्गत आज जनकपुरधाममा मटकोर हुनेछ । मटकोरमा जानकी मन्दिरबाट बाजागाजा सहित महिलाहरु जनकपुरधामको ऐतिहासिक गंगासागरमा पुगि विहेको बेदी बनाउनका लागि माटो ल्याउने छन् । महिलाहरु माटो बोकेर नगर परिक्रमा समेत गर्नेछन् । मटकोरको क्रममा गंगासागरको डीलमा भजनकिर्तनको कार्यक्रम समेत राखिएको छ ।
जानकीको प्रतिकको रुपमा रहेकी बालिकालाई लिएर बाजागाजा सहित मन्दिरको टोली गंगासागर पुग्ने गर्छन् । वैदिक मन्त्र उच्चारण गरि विधिपुर्वक जानकी मन्दिरमा भित्रयाइएको माटोले रामजानकी विवाहका लागि वेदी तयार गर्ने चलन रहेको छ ।
जनकपुरधाममा सप्ताहव्यापी विवाहपञ्चमी महोत्सव अन्तर्गत पहिलो दिन नगर दर्शन, दोस्रो दिन फुलवारी लीला, तेस्रो दिन धनुष यज्ञ, चोथौ दिन तिलकोत्सव र आज पाँचौ दिन मटकोर कार्यक्रम हुनेछ । शुक्रबार स्वयम्बर तथा विवाहोत्सव र शनिबार रामकलेवा संगै विवाहपञ्चमी महोत्सव सम्पन्न हुनेछ ।
