जनकपुरधाम ।
रौनियार सेवा समिति जनकपुरधामद्वारा संचालित ‘सीता रसोइ’ भोजनालयक
उदघाटन सम्पन्न भेल अछि । जानकी मन्दिरक महन्थ रामतपेश्वर दास वैष्णवद्वारा भेल ओ उदघाटन समारोहमे सत्यनारायण भगवानक पूजा सेहो कएल गेल ।
ओ समारोहमे नेपाल रौनियार महासंघक उपाध्यक्ष राजकिशोर गुप्ता, रौनियार सेवा समिति जनकपुरधामक कार्यबाहक अध्यक्ष रामबाबु गुप्ता, समितिक पदाधिकारीसभक उपस्थिति छल ।
जनकपुरधाम ४ भैरव चौकसँ पश्चिम चिल्ड्रेन पार्क लग समितिक सभाहल एवं गेष्टहाउस सेहो रहल अछि । ओही स्थलपर सीता रसोइ बनाओल गेल जानकारी रौनियार युवा मञ्च जनकपुरधाम पूर्व महासचिव पंकजकुमार आजाद रौनियार देलन्हि अछि ।
ओ रसोइमे शाकाहारी भोजन भेटत । एहिसँ पहिने पगला बाबा धर्मशाला आ मारवाडी सेवा समितिमे सेहो संस्थागत रुपसँ शाकाहारी भोजनालय खोलल गेल अछि ।
