जनकपुरधाम ।
निजि विद्यालयका संगठनहरुले जनकपुरधाम उपमहानगरपालिका र नेपाल विद्यार्थी(नेवि) संघबिच भएको सम्झौता बिरुद्ध शुरु गरेको आन्दोलनलाई निरन्तरता दिने गरेको छ ।
निजि विद्यालयका संगठनहरुको आज बसेको बैठकबाट आन्दोलनलाई निरन्तरता दिने निर्णय गरेको हो । उपमहानगरले निजि विद्यालयहरुसंग समन्वय नै नगरी कक्षा ११ र कक्षा १२का विद्यार्थीहरुको छात्रवृति सम्बन्धि सम्झौता गरेपछि निजि विद्यालयका संगठनहरु आन्दोलित भएका हुन् ।
निजि विद्यालयका संगठनहरु प्याब्सन, एनप्याब्सन, मधेस प्याब्सन तथा हिसानको संयुक्त बैठकबाट कक्षा ११ तथा कक्षा १२को विद्यार्थीहरुको छात्रवृति सम्बन्धि समस्या समाधान वार्ताको माध्यमबाट खोज्ने निर्णय समेत गरेको छ । यसका साथै उपमहानगरलाई छात्रवृति सम्बन्धि आफ्नै कार्यविधि निर्माण गर्नका लागि दवाब बनाउने निर्णय समेत गरिएको हो ।
विद्यालय संगठनहरुले जनकपुरधाम उपमहानगरपालिका र नेपाल विद्यार्थी संघबीच कक्षा ११ र १२ का छात्रवृत्तिका सम्बन्धमा भएको सम्झौतामा सुधारको माग गर्दै पत्राचार गरे पनि बेवास्ता गरिएकाले आन्दोलित हुनु परेको जनाइएको छ ।
