जनकपुरधाम ।
मिथिलाञ्चलको लोक पर्व सामा चकेवा सम्पन्न भएको छ । मिथिलानी चेलीबेटीहरुले कातिक पूर्णिमाका राति समदाओन गीत गाएर सामा चकेवालाई विदाई गरी पर्वको समापन गरिएको हो । छठको खरनाबाट शुरु भएको मिथिलाञ्चलको लोक पर्व सामा चकेवाको समापन कातिक पूर्णिमाको राति जोतिएको खेत तथा पवित्र तलाउमा भसाएर (बिसर्जन) गरेर समापन गरिएको हो ।
पूर्णिमाकै राति बहिनीहरु आफ्ना भाइ तथा दाइलाई निमन्त्रण दिए । भाईले घुँडामा राखेर सामा चकेवा लगायतका प्रतिमाहरु तोडेका थिए । तोडिएका मूर्तीहरुलाई जोतेको खेतमा बिसर्जन गरिएको थियो । बहिनीले भने भाइलाई च्युरा, दही, मिष्ठान, सख्खरको भोजन गराएका थिए जसलाई मैथिलीमा ‘फाँरभरी’ भन्ने गरिन्छ ।
सामा चकेवाका मूर्ति माटोले बनाउने भएकोले यसले मैथिल महिलाहरुको मूर्तिकला प्रतिको कौशलको समेत प्रदर्शन गरेको थियो । मिथिलानी चेलीबेटीहरुले माटोबाट कलात्मक वृन्दावन , चुगला , चकेवा , चरा , कजरौटा , सतभैया लगायतका मुर्तिहरु सामा चकेवा पर्वकैलागि बनाएका थिए ।
फोटो- शिवानी मिश्र
