जनकपुरधाम ।
महापर्व छठ पर्व आजदेखि शुरु भएको छ । मुख्य विधिअन्तर्गत पहिलो दिन (चतुर्थी) को विधिमा अरबा–अरबाइन गरिन्छ, जसलाई नहाय–खाय पनि भन्ने गरिएको छ । आज व्रतालुले जीउ चोख्याउने काम गर्दछन् ।
दोस्रो दिन खरना, तेस्रो दिन अस्ताउँदो र चौथो दिन उदाउँदो सूर्यलाई अर्घ दिने परम्परा रहेको छ । सूर्य उपासना परम्पराको मोहक पद्धति मानिएको यो पर्वमा अस्ताउँदो र उदाउँदो सूर्यलाई पूजा गरिन्छ । अहिले मिथिलाको विभिन्न स्थानमा पोखरी सफाईका कार्यहरु युद्धस्तरमा चलिरहेको छ । सो सफाई अभियानमा जनप्रतिनिधिहरुको पनि उपस्थिति रहेको देखिएको छ ।
सूर्य पुराणअनुसार सर्वप्रथम पत्नी अनुसुयाले छठ व्रत गरेकी थिइन् । फलस्वरुप उनले अटल सौभाग्य र परिप्रेम प्राप्त गरिन् र त्यही बेलादेखि छठ गर्ने परम्पराको सुरुआत भएको तथ्य उल्लेख छ ।
