रौतहट ।
नेपाली कांग्रेसका स्थानिय नेता कार्यकर्ताहरूले रौतहटको यमुनामाई गाउँपालिका कार्यालयमा तालाबन्दी गरेका छन् ।
वडा नम्बर ४ को कार्यालय पायक स्थानमा सञ्चालन गर्नुपर्ने माग गर्दै कांग्रेस गाउँ कमिटी कार्यकर्ताहरूले गाउँपालिका कार्यालयमा आइतबारदेखि अनिश्चितकालीन तालाबन्दी गरेको हो । दोस्रो पटक निर्वाचित भएका वडा ४ का अध्यक्ष अश्वनीकुमार यादव (चेतन यादव) ले अपायक स्थानबाट वडा कार्यालय सञ्चालन गर्दा सेवाग्राहीलाई निकै कठिनाइ हुने गरेको कांग्रेसको तर्क छ । पटक पटक वडा अध्यक्ष, पालिका अध्यक्षसँगै प्रमुख जिल्ला अधिकारीलाई ध्यानाकर्षण गराउँदा पनि समस्या समाधान नहुँदा बाध्य भएर २४ घण्टे रिले अनसन बसेको कांग्रेस पालिका सभापति सिताराम यादवले बताए ।
यमुनामाई गाउँपालिकाका प्रमुख प्रशासकीय अधिकृत रामश्रेष्ठ यादवले तालाबन्दीको कारण अहिले चलिरहेको विपद व्यवस्थापनको कामहरू प्रभावित भएको बताए ।
