जनकपुरधाम ।
जनकपुरधाम उपमहानगरपालिका– २४ का वडाध्यक्ष उपेन्द्र सहनीबिरुद्ध अख्तियार दुरुपयोग अनुसन्धान आयोगले मुद्दा दर्ता गरेको छ । वडाध्यक्ष सहनीबिरुद्ध विशेष अदालतमा मुद्दा दर्ता भएसंगै उनी निलम्बनमा समेत परेका छन् ।
अख्तियार दुरुपयोग अनुसन्धान आयोगको बर्दिबास कार्यालयले घर बाटो प्रमाणित गरिदिनकालागि सेवाग्राहीसँग ४ लाख ५० हजार रुपैयाँ घुस लिएको अरोपमा वडाध्यक्ष सहनी, वडा सचिव उपेन्द्र साहु तेली र कार्यालय सहयोगी विजय मण्डललाई नियन्त्रणमा लिएको थियो ।
आयोगका सहायक प्रवक्ता देवीप्रसाद थपलियाले घर बाटो प्रमाणित गरिदिनकालागि सेवाग्राहीसँग साढे ४ लाख घुस माग गरेको सूचना एवं उजुरी निवेदनका आधारमा वडाध्यक्षसहित तीनजनालाई पक्राउ गरेकोमा अनुसन्धानको सिलसिलामा तीनै जनाको आपसी मिलोमतो तथा योजनामा घर बाटो सिफारिस प्रमाणित गरी दिनका लागि सेवाग्राहीसँग घुस लिएको पुष्टि भएकाले वडाध्यक्ष र वडा सचिवसहित तीनैजना विरुद्ध मुद्दा दर्ता गरेको जानकारी दिए ।
