एजेन्सी ।
नेपालमा ठूलो जनधनको क्षति हुने गरी भएको बाढी र पहिरोको विपत्तिपछि अब भारतीय राज्य विहारमा डुबान सुरु भएको छ ।
भारतीय सञ्चार माध्यमका अनुसार बिहान ५ बजे कोशी ब्यारेजमा पानीको सतह ६ लाख ६१ हजार २ सय ९५ क्युसेक पुगेको छ जुन १९६८ पछिकै सर्वाधिक हो । विहारका विभिन्न राज्यमा बाँध टुटेको नवभारत टाइम्सले उल्लेख गरेको छ । मानिसहरुको घरदेखि अन्नबाली लगाएका खेत डुबानमा परेको बताइएको छ ।
नेपालमा परेको भारी वर्षाको असर भारतीय रेल्वे सेवामा समेत देखिएको छ । भारतको जोगबनी सीमानजिक नेपालमा भएको भारी वर्षाको पानी जोगबनीको टिकुलिया बस्तीमा शनिबार राति पस्न सुरु गरेको थियो । अहिले रेलवे ट्रैकमै पानी जमेको छ ।
योसँगै जोगबनीबाट खुल्ने सबै रेलसेवा बन्द भएका छन् । जोगबनीमा अन्तिम रेलवे स्टेसन रहेको छ ।
नेपालमा वर्षा कम भएसँगै कोसी र अन्य नदीको जलक्षेत्र भने कम हुँदै गएको बताइएको छ । बिहान ९ बजेसम्म कोसी ब्यारेजबाट ६.२८ लाख र १० बजे ६.१२ लाख क्युसेक पानी छोडिएको छ ।
कोसी ब्यारेजनजिकै नेपालको वराह क्षेत्रमा बिहान ९ बजे २.९० लाख क्युसेक पानी रेकर्ड भएको बताइएको छ । कोसी ब्यारेजबाट निस्केको पानीले कोसी तटबन्धभित्र करिब ३०० गाउँमा बाढी पसेको छ ।
