जनकपुरधाम ।
मधेशका मुख्यमन्त्री सतिशकुमार सिंहको कार्यशैलीप्रति सत्ता गठबन्धनकै बैठकमा आलोचना गरिएको छ । मुख्यमन्त्री सिंहले नै बोलाएको सता गठबन्धन दलको बैठकमा सहभागी नेताहरुले मुख्यमन्त्रीको कार्यशैली संतोषजनक नरहेको भन्दै आलोचना गरे । बैठकमा नेताहरुले कार्यशैलीमा सुधार नआए विकल्प खोज्ने सम्मको स्थिति आउन सक्ने चेतावनी समेत दिइएको बैठकमा सहभागी एक नेताले बताए ।
सरकारी नियुक्तिमा एकलौटी गरेको, प्रदेश सरकारले विभिन्न बोर्ड तथा आयोगमा राजनीतिक नियुक्ति गर्दा गठबन्धन दलसँग छलफल नगरेको, आर्थिक वर्षको दुई महिनाभन्दा बढी समय बित्दापनि प्रदेश सरकारको कामहरु सुरु हुन नसकेको भन्दै गठबन्दन दलका सांसद तथा नेताहरुले मुख्यमन्त्री सिंहको आलोचना गरेका छन् ।
बैठकमा सरकारमा सहभागी हुने समयमा भएको सम्झौता, बजेटमा भएको त्रुटि सुधार, प्रदेश सरकारले गरेको नियुक्तिको विषयमा छलफल भएको बैठकमा सहभागी एक नेताले बताए ।
बैठकमा सत्तागठबन्धनमा रहेको ४ दलबीच छलफलै नगरी मुख्यमन्त्रीले एकलौटी निर्णय गर्दै आएकोमा दलहरुले आपत्ति जनाएका थिए ।
