जनकपुरधाम ।
सिरहामा छोराको कुटाईबाट बुवाको मृत्यु भएको छ । सिरहाको औरही गाउँपालिका–३ खजनपुर टोलका ६५ वर्षीय भालेश्वर यादवको छोराको कुटाईबाट मृत्यु भएको हो ।
जिल्ला प्रहरी कार्यालय सिरहाका प्रहरी नायव उपरीक्षक मुक्ति सापकोटाका अनुसार घरायसी विवादमा सोमबार साँझ आफ्नै छोरा ३८ वर्षीय शैलेन्द्रकुमार यादव र बुहारी रेणुकुमारी यादवले उनलाई कुटपीट गरेका थिए ।
गम्भीर घाइते भालेश्वरको प्रादेशिक अस्पताल सिरहामा प्राथमिक उपचारपछि थप उपचारका लागि विराटनगरस्थित नोबेल अस्पताल लैजाने क्रममा बाटोमै मृत्यु भएको प्रहरी नायव उपरीक्षक सापकोटाले बताए ।
कुटपिट लगतै प्रहरी चौकी औरहीबाट गएको टोलीले छोरा शैलेन्द्र यादवलाई नियन्त्रणमा लिएको छ ।
मृतक भालेश्वर यादवको शव मंगलबार पोष्टमार्टमपछि उनको अर्का छोरा रामप्रताप यादवलाई जिम्मा लगाइएको छ ।
पक्राउ परेका छोरा शैलेन्द्रमाथि कर्तव्य ज्यान मुद्दामा सिरहा जिल्ला अदालतबाट पाँच दिनको म्याद थप गरी अनुसन्धान भइरहेको जिल्ला प्रहरी कार्यालय सिरहाले जनाएको छ ।
