एजेन्सी ।
ताइवानले लेबनानमा हिजबुल्लाहका पेजरमा भएका विस्फोटबारे स्पष्टीकरण दिएको छ । ताइवानको सरकारले सशस्त्र समूह हिजबुल्लाहले प्रयोग गरेका हजारौँ पेजरका पार्ट्स आफ्नो देशमा नबनाइएको बताएको छ ।
यो बयान ताइवानी कम्पनी गोल्ड अपोलोको बयानपछि आएको हो, जसमा यो हमलामा प्रयोग गरिएका उपकरण नबनाएको भनिएको थियो । लेबनानी सरकारले मंगलबार भएका हजारौँ पेजर विस्फोटमा दुई बालबालिकासहित १२ जनाको मृत्यु तथा कम्तीमा ३,००० व्यक्ति घाइते भएको बताएको छ ।
पेजरका साथै वाकी–टकी पनि विस्फोट भएको र यसमा इजरायललाई आरोप लागेपछि दुई पक्षबीच तनाव बढेको छ । शुक्रबार ताइवानका अर्थमन्त्री कुओ जि–हुईले पत्रकारहरूलाई भने, ‘हिजबुल्लाहका पेजर हाम्रो देशमा बनाइएको थिएन ।’
यस विषयमा न्यायिक छानबिन सुरु भइसकेको पनि उनको भनाइ छ । उनले भने, ‘म सत्य उजागर गर्न चाहन्छु, किनभने ताइवानले त्यो मोडलको पेजर कहिल्यै निर्यात गरेको छैन ।’ यसअघि गोल्ड अपोलोका प्रमुख सु चिङ–कुआङले यी दुर्घटना र आफ्ना उपकरणबीच कुनै सम्बन्ध नभएको बताएका थिए ।
हुइका अनुसार हङ्गेरियन कम्पनी बीएसी कन्सल्टिङलाई गोल्ड अपोलो ब्रान्ड नाम प्रयोग गर्न अनुमति दिइएको थियो । यद्यपि, बीएसीको सीईओ क्रिस्टियाना बार्सोनी–असिडियाकोनोले अमेरिकी समाचार प्लेटफर्म एनबीसीसँग यी पेजर आफ्नो कम्पनीले नबनाएको दाबी गरेकी थिइन् । हंगेरी सरकारले भनेको छ, ’देशमा बीएसीका कुनै उत्पादन वा कारखाना छैनन् ।’
तर न्युयोर्क टाइम्सले आफ्नो एउटा रिपोर्टमा इजरायली गुप्तचर अधिकारीहरूलाई उद्धृत गर्दै बीएसी एउटा शेल कम्पनी भएको र यसले इजरायलका लागि काम गरेको बताइएको छ ।
