काठमाडौँ ।
जनमत पार्टीका अध्यक्ष सीके राउतको पत्नी सोनी सिन्धुले शान्ति सुरक्षाको माग गर्दै निवेदन लिएर प्रहरी कार्यालयमा पुगेकी छन् । श्रीमान राउतकै कारण आफू असुरक्षित महशुस गरिरहेको भन्दै सिन्धु ललितपुरस्थित प्रहरी प्रभाग इमाडोलमा पुगेकी हुन् । यद्यपि प्रहरीले आफ्नो निवेदन लिन लिन नमानेको उनले आरोप लगाइन् ।
प्रहरी वृत्त सातदोबाटोका डीएसपी चित्र भट्टराईले सोनी सिन्धुले दिएको निवेदन लिन आफूले मातहतलाई भनेको जानकारी दिए । उनले भने, ‘मैले प्रभाग इमाडोललाई निवेदन लिनु भनेको छु ।’
राउतले पनि यसअघि नै प्रहरीमा शान्ति सुरक्षाको निवेदन दिएका थिए । उनीहरूको मुद्दा अदालतमा विचाराधीन छ । राउतले पत्नीसँग छोडपत्र माग गरेर अदालतमा रिट दायर गरेका छन् । तर राउतले संचारमाध्यमहरुमा आफूबिरुरद्ध भ्रामक समाचार सम्प्रेषण गरिएको भन्दै केही संंचारमाध्यम तथा संचारकर्मीहरु बिरुद्ध उजुरी समेत दिएका छन् ।
