लोकतान्त्रिक समाजवादी पार्टी (लोसपा)को मधेश प्रदेश संसदीय दलको नेतामा जितेन्द्र सोनल चयन भएको विभिन्न संचारमाध्यममा एकाएक समाचार आयो । त्यसको केही घण्टा नबित्दै लोकतान्त्रिक समाजवादी पार्टीका अध्यक्ष महन्थ ठाकुरद्वारा हस्ताक्षरिक एक विज्ञप्ति जारी गर्दै लोसपा मधेस प्रदेशको संसदीय दलको नेतामा अभिराम शर्मालाई नै निरन्तरता दिइएको जनाइयो । यसले लोसपा भित्रको विवादलाई छत्ताछुल्ल पारेको छ । यस विषयमै केन्द्रित रहेर लोसपा मधेस प्रदेशका प्रभावशाली नेता एवं प्रदेशसभा सदस्य उपेन्द्र महतोसंग मोडेलखबरका समाचार संयोजक जयन्त ठाकुरले कुराकानी गरेका छन ।
अभिराम शर्मा नै संसदीय दलको नेता रहेको अवस्थामा जितेन्द्र सोनललाई संसदीय दलको नेता चयन गरिएको समाचार कसरी बाहरियो ?
हाम्रो पार्टीका अध्यक्ष महन्थ ठाकुरले हस्ताक्षर गर्नु भएको आजकै विज्ञप्तिले स्पष्ट पारेको छ लोसपा मधेसको संसदीय दलको नेता अभिराम शर्मा नै हुन् । कसैलाई सामाजिक सञ्जालमा बधाई दिएर कुनै दलको संसदीय दलको नेताको रुपमा चयन गर्न सकिदैन । अभिराम शर्माजी नै हाम्रो संसदीय दलको नेता हुनु हुन्छ ।
अभिराम शर्मा निलम्बित रहेको अवस्थामा उहाँलाई कसरी निरन्तरता दिनु भएको छ यहाँहरुले ?
निलम्बन जो कसैलाई पनि गर्न सकिन्छ । अभिराम शर्मा अझै मधेसको प्रदेशसभाका प्रदेशसभा सदस्य हुनु हुन्छ । उहाँको पद अहिले रिक्त भएको छैन । उहाँको निलम्बन फुकुवा भए लगत्तै फेरी आफ्नो कार्यभार सम्हाल्नु हुन्छ ढुक्क हुनुस ।
निलम्बन भई सकेको अवस्थामा अभिराम शर्माको विकल्पको खोजीमा यहाँहरु हुनु हुन्छ कि नाई ?
पक्कै पनि होइन । उहाँ व्यक्तिगत मुद्दामा पर्नु भएको छैन । उहाँलाई मधेस र मधेसीकालागि लडेकै कारण फसाइएको यथार्थ यहाँका जनतालाई बुझ्न जरुरी छ । उहाँको मुद्दाको अन्तिम फैसला नआएसम्म विकल्पको विषयमा सोच्नै सक्दैनौँ । राज्यले अन्याय गर्यो गर्यो पार्टीबाट उहाँमाथी अन्याय हुन दिदैनौँ ।
यो विषयले लोसपा भित्र चरम असन्तुष्टी र विवाद रहेको छत्ताछुल्ल भएको छ नि ?
कुनै व्यक्तिको महत्वाकांक्षा हावी भएपछि यस्तै हुन्छ । व्यक्तिगत महत्वाकांक्षाका लागि मधेस र मधेसीका लागि लड्ने व्यक्तिमाथी अन्याय हुन दिदैनौँ । पार्टी भित्र कुनै किसिमको विवाद छैन । व्यक्तिगत महत्वाकांक्षाका लागि काम गर्नेको विकल्पसम्म हामी खोज्न सक्छौँ ।
यस्तै विवाद रहे के गर्नु हुन्छ ?
पार्टीलाई अहित हुनेगरी व्यक्तिगत महत्वाकांक्षा र स्वार्थका लागि काम गर्नेलाई नै हामीले पार्टीबाट कारबाही गर्ने छौँ ।
